يا حليل الزمن الجميل ..

ويا حليل أيام النخبه ..

وأيام ليدر وموقعهم ..

الزول عرفك في فتره بسيطة ..

لكن حسى بالقيمة الفردية ..




ربنا يديم الأيام .. والمحبه تجمعنا ..

وفي أنتظارك ..

+++++ الإنجليز ي يا عزيزي ج 2 +++++++


هو الإنجليزي يازول يا ليزي ..

كان صعب أو كان إيزي ...

حقو تعرف سبب التعب يا عزيزي ..

----------------------------------------

تمامة لما انقطع من نبش في جدار التذكارات ، والكلمات الطيبات ، في حق الإنجليزي سيد الكلمات ، ومحطة المتعلمين والمتعلمات.

لا أدري لعل (الخشوم) تتلعثم وتتكبد المشاق في سبيل كلمة واحدة بالأجنبي - هذا في فترة ما يمسى بتعلم الإنجليزية ، والفصل الدراسي الأول (Sem1).

ولعله تم تحنيكنا في كل المواد ، وبالتعب جبنا الباص ، لأننا فقط كنا لا نجيد الإنجليزية بالطريقة الصاح . فترى الدرجات في أول فصل دراسي تنساب ما بين

مرور ورسوب ، وباقي المفاتيح (F) مفتاح السقوط الكبير :d .

حتى ذكر أخونا الكاشف (....) على سيرة الرسوب أن (مجموعة السواسيو (C) غلبت مجموعة المفاتيح (F) فانكسر الباب وسقطنا من يومها ) وتاثرت درجاتنا

لباقي السمسترات ، ونحن نلعن في دواخلنا حتى اليوم تناظير وزارة التربية و(التأليم) التي قدمت لنا اسوأ أساتذة لا يجيدون هم أنفسهم الإنجليزية ، دعك من كونهم يجيدون التدريس نفسه

أم لا ...

وحتى لا ينكشف غطاء الضحك كثيرا ، فأننا في كل خطواتنا مع هذه اللغة التي كنا نلعن أبو اليوم اللي تم تعليمنا إياها فيه ، أصبحنا ندرك أن الإنجليزي هو مفتاح العلم في هذا الزمن

الذي سيطرت عليه أفكار العولمة والإنترنت ، وتأكدنا بما لا يدع مجالاً للـ(فك) أن أصوب قرار كان في تعلمنا اللغة الإنجليزية في الجامعة .

وصدقني يا من لا يدرك هذه الأشياء ، الموضوع ليس صعباً جدا ، فقد علمتنا التجربة أن اللغة فرس الشجعان ، لا ينبغي أن نخاف من الخطأ ، فحتى الأطفال يقعون الكثير من المرات

ليتعلمو المشي . فما بالنا نحن الكبار لا نخطيء حتى نتعلم ما يمكن أن يكون سبب تطور في حياتنا .

__________________________________________________

لنا عودة في جزء ثالث إن شاء الله

مان يا مان والله زكرتنا الزمن الجميل والجامعة وما ادراك ما الجامعة



اها النحكى ليك عن الجامعة شوية كدا


طبعا انحنا كنا عبارة خمسة اولاد امتحنا سوا ودخلنا الجامعة سوا وطبعا نزلنا سناااير وحياتك مفتحين لانو جينا الجامعة كتيييير قبل ما ننزلا يعنى ممكن تقول فى حبة برلوم كدا يعنى



المهم انا اتبرلمتا فى سنة تانية يعنى بعد ما بقيت سنير بنات من كلية اداب عملو ليك فينا عملية انسى بس

مشينا نصلى فى المسجد وبع ما انتهينا من الصلاة كل واحد بيفتش فى جزمتو ما لقاها

لقينا فردة فى وفردة مافى


وبقينا نفتش ونفتش .. بعد داك عرفنا انو فى زول ركبنا الماسورة يعنى اتبرلمنا ونحنا كبااار يخسى والله منظرنا كان يحنن


المهم انا غايتو جازفتها بى جاى وبى جاى وشلتا ليك سفنجة من عمك حسين بتاع الشاى فى كلية الاداب واتخارجتا على قاعة القزاة ( الليبى) دا المكان البنقعد فيهو وطبعا انا ولمن وصلت هناك خلاص نسيت البرنامج قلتا دا بيكون واحد من الشبابا بيهظر وبعدين بيرجع لينا باقى الجزم



قعدت ومعاى الشباب وحكيت ليهم على الحاصل اها قام واحد فيهم كلمنى قال لى فلانة وفلانة جابو ليهم كيس كبيييير مليان جزم وختوهو فى نص الفسحة بتاعت القاعة


وانا اقوم اعاين ليك لى الكيس القاهو فعلا خاتينو فى النص يعنى اى زول يجى يشيل جزمتى الناس حاتشوفوا وتضحك فيهو .. منظر انسسسسسسسسسسسسسسى بس


المهم بقيت كيف امشى اشيل فردة جزمتى امشى ما امشى واقول لى صاحبى انان فى اولى ما اتبرلمتا اجى اتبرلم فى تانية شييييييييييييييييييييييييييييييييييييييييييينة


وقلتا لقيت ليك عوض الله بتاع السجاير وناديتو ليك قلتا: ليهو عوض الله امش جيب الكيس داااااااااااك بديك الف جنيه قال لى لا عدييييييييييل هو طبعا عندو (لجنة) فى لسانو

انتا دايل تبللمنى انا امس انتا يا حوى


ااااااااااخ قربتا اخبت بيهو الواطة .. المهم استفذانى واستقلانى وقال ما بيرضى الا بى خمسى الف جنيه وفعلا اديتا ليها وقلتا ليهو جيب لى الكيس ورا قاعة جغرافيا بعيد عن العين

جاب لى الكيس وشلتا جزمتى

وبقا همى كلو اعرف العمل فينا الحركة دى وبعد متابعة وجهد مضنى خسرتا فيهو الكتير من العزومات وسندوتشات البيرجر اتوصلتا لى الجناة



طلعوا بنات كمان ورتنى ليهم واحدة همها بطنها راس ملا سندوتش بيرجر ومعاهو بيبسى


وبعد داااااااك ربطت وش كلب وبديت عملية البحث عنهم وربك رب الخير دلانى على مكانهم وهو المكان المعتاااااااااااااااااد


( الاستراحة)


قاعدين اتجلبطو جوا وماعارفين الراجيهم شنو برا


والله مشيت اشتريت ( طبلة كبيييييييرة ابو سبعة الف ) وجيت قفلتا ليك الاستراحة بى البنات الفيها


ومشيت على الفرد وكلمتهم واى زول الاقيهو اقول ليهم قالو استراحة اداب فى زول قفلا والناس اتلمت برا ومشو كلمو الحرسويات وجو يكسروا الطبلة الديرا ليها سنة عشان تتكسر والله الا كسرو القفل دا بعد ما وشهم بقى زي علبة الالوان هههههه


وكدا انا اخدت بى تااااااااااارى

في انتظار المزيد يامان

^^^ أرقصي يا بنشات ^^^^^

لمن يعرف ، ولمن لا يعرف فهي بنشات الجامعة وهي أراضي ومقر التسكع (وما أحلى تسكع الجامعة) ...

كل ما أشوف لي شلة شباب حلوين وطلبة جامعة قاعدين يضحكو على بعض أو يتثاغلو ويتغاتتو غتاتة الجامعة أضحك ضحكة كبيرة من جوا ...

وأقوليهم في سري اصلها أيام وبتعدي ، أضحكو أصلو الجري في الجامعة بيعلم الواحد يتخيل بدون مسئوليات شكل حياة نرجو إنو يكون أفضل ...

البنش واللمة الجميلة .. والخلط .. والكورة والتشجيع .. والحفلات .. والرقصات ..

الضحكات العالية ... والخوة الجميلة ..

الفرجة على الجميل .. والزعل من القبيح ..

أيام ليها ايقاع ودوزنة ..

أنا بسميها أيام الرقص مع البنشات

لأنو حقيقة البنشات وأماكن اللمة في الجامعة مكان ما كانت ومهما تكون طبيعتها ، بترقص طرب من وجود الطلبة وبتزعل من خلو البلد من النشاطات

بسجل هنا نوتة ذكريات خاصة بكل الأيام من ما كنا برالمة .. لحدي ما صرنا سناير وخريجين ..

وبكتب اسمي في دفتر حضور المحاضرات الجميلة ، والتشجيع للكورة الراقية ، والجمهور الواعي ، وفي حصص الشوق للحلوين

أرقصي يا بنشات في ذاكرتي كل يوم لأنك تذكار خاص بكل لحظات الطرب .. وابتهجي ما تزعلي نحنا مشينا وجو غيرنا ملوك ..

أصلو طبعك كان ولوف ...

والناس عليك جاية ميات وألوف ...

ليك وحشة يا بنشات ...

مان الفنان

بصفتي من رواد مكتب الطابق العلوي جوار المكتبة واعلى البنشات الجنوبية

اقدم لك دعوة بالجلوس في البنشات واسترجاع احلى الذكريات


يوم IT