هنا حيث لا احد يأتي

المسلمي · **مرسل:** الأحد مايو 24, 2009 12:22 pm

هنا حيث لا احد ياتي

لا تخف يا عزيزي

اعلم انك هنا تعاني الوحده

وامراض الشيخوخة المبكرة

لا احد هنا يسال عليك

لا احد يمر من هنا

تجلس وحيدا شامخا

لا باس عليك بعد اليوم

سوف ءأتي اليك كلما جئت هنا

ليس لدي ما اقوله لك

ولكني سوف احاول ان اكتب كل ما يخطر علي بالي

اتفقنا

:wave:

المسلمي · **مرسل:** الأحد مايو 24, 2009 1:04 pm

اسمو عبدالله ناس الحلة سمو عبدالله العوير هو ما عوير بس زول طيبان شديد

يعني لو عندو جنية واحد قدر حق المواصلات جيتو قلتا ليه اخوك مزنوق في كم جنية كده

ما بلقي عندك سلفية لحدي اليوم الفلاني علي طول يديك الجنية العندو ويعتذر ليك انو

باقي المبلغ ما عندو التقول انتا دايرن منو دين , وهو يتوكل علي الله يمشي كداري اكان

المسافة معقولة واكان المسافة بعيدة برضو بصل بس ما عارفو بصل كيف غايتو مرات

بشوفو زول بركة ومرات اقول الزول دا مدروش بس عوير دي ما متفق معاهم فيها

زمان لما كنا نشوف لينا زول عوير الزول العوير الجد جد بنقول ليه (خليقة) يعني ما زي

عبدالله العوير زي عبدالله كان ممكن يسمو عبدالله الدرويش بتكون احسن

اها مره نحن مجموعة من الشفع قاعدين نلعب تحت شدرة جاء ولد خليقة او بلهي

اسمو حسن بس الغريبة ما قاعدين يناهو بي حسن الخليقة ولا حسن العوير كان

بقولو ليه حسن ود المناوي ، المناوي طبعا اسم امو بس نحن كنا فاكرين المناوي

اسم راجل .

معانا شفع اولاد جن قالو لينا حسن دا مشارك يعني عندو جني بخدمو لو طلب منو

اي حاجة بعملي ليه اها قلنا ليه دايرنك تطلع لينا كديسة من الواطة دي هسة ولو

ما طلعتها لينا من هنا ما بتمشي وكان جريت مننا والله الا ندققك و نكسرك

كفاية لحدي هنا عندي مشوار ضروري

بجيكم راجع وقت تاني

الزمن كبس

?!?wHaT_EveR · **مرسل:** الاثنين مايو 25, 2009 1:06 pm

7elo mtab3a
lel2sf zy 3bd allah da ana b3tbro sh5sya 5orafya mafessha fe 3alm albshr

المسلمي · **مرسل:** الاثنين مايو 25, 2009 3:58 pm

نواصل

كنا واقفين وين

ايوه في كديسة حسن ود المناوي

اها بعد هددناهو انو بندقو لو ما طلع لينا كديسة من الواطة ، الحقيقة خاف مننا

وقعد يحفر في الواطة ونحن نعاين في الحفرة منتظرين الكديسة تطلع وهو يحفر

وقت المسافة طالت وهو يحفر ومافي اي حاجة طلعت قام مننا شافع شوم ولد غضب

اداهو ليك صقعتين في راسو و ام دلدوم * بي طول يدو في ضهرو لمن قعد يبكي

وباقي الشفع المعاي قامو دايرين يدقوهو برضهن ، انا حنيت في حالو خصوصا انو

الزول مسكين الله والرسول وهو زاتو معزور شوية عندو تخلف عقلي بس ما مجنون

في الطب بقولو ليهن الاطفال المنغوليين ولا شنو كده ما عارف

اها قمت حميتن منو قلت ليهن والله زول بعد دا يسالو مافي ، قلت اخوفن شوية

قلت ليهن الزول دا زول بركة وعندو شيطان بجيهو في الليل وبقلبو كديس اي زول

يسالو بي النهار بجيهو في البيت وبعضيهو ببقي زيو ولا يبقي كديس

الغريبة انا الالفت ليهن القصة عشان يخافو لكن برضي صدقتها ، اها الجماعة خافو

وقامو طوالي قالو ليه معليش بنهظر معاك ساكت عليك الله بعدين ما تجي تسالنا

سكت ما قال ليهن حاجة قمت انا قلت ليهو خلاص بعد دا انت امشي اهلك ومافي زول بسالك

المسكين صدق وفات بعد فترة كدة ..........................

خلاص كفاية الباقي المره الجاية

* ام دلدوم = يعني تجمع اصابع يدك مع بعض زي الداسي ليك حاجة في يدك وتضرب بيها الزول في ضهرو (وضح مش) :lol:

المسلمي · **مرسل:** الاثنين مايو 25, 2009 4:28 pm

المسلمي · **مرسل:** الثلاثاء مايو 26, 2009 6:52 pm

نواصل

بعد فات بي فتره كده سمعنا انو حسن ود المناوي اتوفي الحقيقة ما صدقنا

ما عارف كنا فاكرين انو ما بموت ولا عشان موتو جاء فجاءة كده

عندو اخوهو انصار سنه بعد الناس ما دفنو في المقابر قال ليهن بارك الله فيكم

وجزاكم الله خيرا ونحن الزول دا (سبلناه) يعني ينتهي العزاء بإنتهاء مراسم الدفن

حتت انو ما يعملو ليه فراش دي اسرتني بالرغم من انو انا ما مشيت معاهم المقابر

لانو كنت بخاف لمن اسمع بي زول اتوفي ما بخاف من الموت بس بخاف من دفن الزول

في التراب كنت بتخيل انو لما يصحي ما حا يلقي طريقة يتنفس ولا بقدر يقوم تاني

اللهم اغفر لموتانا وموت المسلمين امين يا رب العالمين

طبعا اليوم داك يوم وفات حسن اليوم كلو ساكت ما مصدق الحصل بس بعد فترة

نسينا زي الماكان في شي ودي طبيعة الانسان انو بينسي ورجعنا تاني لي اللعب

تحت الشدرة وطبعا الشدرة دي عندها معانا قصص كتيرة انشاءالله بنجيها

المسلمي · **مرسل:** الأربعاء مايو 27, 2009 7:56 pm

نواصل

طبعا الشدرة النحن قاعدين نقعد فيها زاتا قالو لينا انو الشدرة دي مسكونة

لانها قايمة في حفير * وحده زي الضرس في خشم المره العجوز قالو لينا

في الليل فيها انوار بتولع وبطلعو منها شواطين يمشو لحدي الحفير جوه

يجيبو موية ويجو يطلعو يتونسو لي الصباح

مره واحد صاحب عمي بحكي لينا قال مره قاعدين يلعبو كورة جنب الشدرة

من العصر لمن الواطة مغربت ابو يوقفو اللعب اها فجاءة جو ناس قعدو يلعبو

معاهم باصي * لي يباصو ليهو الكورة شوت جاي يشوتو ليهن الكورة

اها واللعبة مسخنة وهم يضحكو ويلعبو قام عمي شات الكورة قوي ضربت

الشيطان في بطنو طبعا نحن الواحد لما تضربو الكورة في بطنو بقول أأأأأأأأ

اها هو لمن ضرب الشيطان في بطنو قال ووووووووووووي عمي انبهط من الصوت

قال بسم الله في قولة بسم الله دي يلقو ليك روحن واقفين وحدن في حتة خلا

تبعد من الحلة مسافة 2 كيلو والليل امسي تب اها من هناك جو جارين الحلة جري

واحد بتكلم مع التاني مافي لمن خشو الحلة

بكرة لمن جو يلعبو عمي سال صاحبو قال ليه ويني الكورة قال ليه انا قايل فتناها قبلا البارح

* الحفير = عبارة عن حفرة متوسطة العمق والطول والعرض بستخدموها عشان تحفظ مياه الامطار

* باصي = يعني العب الكورة لي اي شوت لي الكورة

mercedes · **مرسل:** الأربعاء مايو 27, 2009 10:37 pm

"هنا" حيث يأتي الجميع

ليأخذو "تكية" في "ضل" سردك الجميل..

..في انتظارك...

المسلمي · **مرسل:** الجمعة مايو 29, 2009 5:53 pm

المسلمي · **مرسل:** الجمعة مايو 29, 2009 6:23 pm

قصة اول سجارة

طبعا نحن مجموعة من الشفع كنا طوالي بعد نجي من المدرسة الواحد يمشي البيت يغير

ملابس المدرسة عشان ما تتوسخ ونجي نلعب تحت الشدرة دي

كنا بنخاف من المعلمين خوف شديد وكان طابور التفتيش كل يوم سبت ويوم التلاتاء يجي الاستاذ

ماري في الطابور اذا كان لقي ملابسك وسخانة ولا ما مضفر اصابعيك ولا شعرك كتير يطلعك بره في الطابور

ويجلدوك والعجب اذا كان الدنيا شتاء تدخل يديك في موية بارده ويجلدوك فيهن اما اذا كان الوقت غير الشتاء

فالجلد بالباسطونة اذا كان استاذ ولا بي المسطرة في ضهر يدك اذا كانت استاذه رجال وتدقنا مره حكمة غايتو :lol:

اها اذا يوم نسيت اضفر اصابعي لحدي ما جرس الطابور ضرب كنت برجع الصف الاخير ولا القبل الاخير عشان

انا قصير واقعد اضفر فيهن بي سنوني و بعد انتهي منهن بدعكن مع بعض ولابي شوية تراب عشان ما يظهرن

اني ضفرتهن في الطابور :lol:

وكان عندنا استاذ صعب خلاص وكان قصير بقولو ليه الدعيتا* وهو ما برضاها وكلنا كنا بنخاف منو خوف شديد

دا حفظنا الرياضيات والتربية الاسلامية حفظ خوف منو بس الواحد تلقي نايم ويسوي الاصل في الاشياء الاباحة

والغريبة انا كنت حافظها بس ما فهمتها الا بعد زمن انو اصل اي شي مباح في الشرع ما لم يرد نص يحرمة :wink:

اها يوم قاعد في الفصل معاي زميلي قلت ليه امس الاستاذ جاء بي عند بيتنا اكان اخوي الصغير قال ليه

الدعيتا طق الحيطة مع اخر كلمة القي ليك الاستاذ واقف جنب الباب بتاع الفصل قال لي اسمع تعال لاحقني

في المكتب ومشي :shock:

قلت كده خفت خوف شديد واتمنين الواطة تبلعني ولا امشي ليهو المهم اتوكلت علي الله ومشيت ليهو

قلت اقراء ليه اي سوره تحلني منو سورة الفاتحة غلبني :lol:

اقراها وقت جيت وقفت قدامو في المكتب

قال لي قلت شنو في كلامو دا جسمي كلو قعد يرجف والدموع جن جاريات جري الاستاذ وقت شافني

اجرست قدر ده اظنو حن في حالي قال امشي وبناديك بعدين اريتو كان اداني دقتي ومشيت :mrgreen:

يومين تلاتة اسبوع شهر سنة كل يوم اقول هسي بناديني ويسالني تاني الغريبة لي يوم الليلة تاني

ما سالني .

غايتو جنس خوف :lol:

* الدعيتا = عندنا بقولوها لي الزول القصير شديد

اها نرجع لي موضوع السجارة المره الجاية انشاءالله

المسلمي · **مرسل:** الثلاثاء يونيو 09, 2009 7:59 pm

قصة السجارة الاولي

اذكر جيدا ذلك اليوم قد تجمعنا كعادتنا في تلك الشجرة

وبدانا نتحدث لم نكن نتحدث عن شي محدد بل كنا نتونس

ونحن علي اقصان الشجرة هذا في تلك الناحية وذاك في الناحية الاخري

وبعضنا كان يتمرجح علي حبل غليظ كنا نربطة بين اغصان الشجرة

فجأة وجدنا عملة ورقية من فئة العشرة جنيهات في ذلك الزمان وهي تعادل

الان واحد جنية

وكنا عادتا نجد بعض النقود عندما تاتي رياح فنذهب الي الشجر القريب من القرية

بحثا عما تحمله هذه الرياح من نقود لست ادري هل كان الناس قديما اغنياء ام انهم مجرد مهملين فقط

المهم تجمعنا عليها وفكرنا فيما نفعل بها قال احدنا امش اجيب ليكم بها فول وتسالي

قلنا لا ما دايرين فول وتسالي قال احدهم امش اجيب ليكم بها حلاوي نعناع قلنا ليه ما دايرين حلاوه نعناع

اها اكان معانا شافع جن اكبر مننا بي سنتين قال لينا رايكم شنو نشتري بيها سجاير

قلنا فكرة نجرب السجاير دي بتسوي شنو

قلنا عشان ما نلفت النظر يمشو اتنين يشتروها ويجونا بي جاي بعد داك نمشي نشوف لينا محل نشربا فيها

اها جو وجابو معاهم تلاته سجارات ولبان فتشنا محل عشان نشربها فيهو مالقينا

اخر حاجة اتفقنا نمشي الغابه الجنب الحلة وفعلا مشينا ونحن قريب ستة شفع

كل اتنين شالو ليهن سجاره وبدينا نشرب فيها الزول المعاي بدا هو اول حاول شربها وما عرف

قلت ليه اديني ليها جاي واول نفس جريتو ليك منها القحة وقفت في السماء الشي دي حاره حراء في الحلق

وقعدت اقحقح كح كح كحححححححححححححح قلت ليه انا ماداير هاك ليها انت

ت:-
الغريبة ما سوت لينا اي حاجة غير القحة ديك بس

يعني لا في كيف ولا الراس لفه :lol:

Salmano · **مرسل:** الثلاثاء يونيو 09, 2009 11:07 pm

تزوغ بجاي تكتب سااي ..

واااااااااصل بس ..

المسلمي · **مرسل:** الأربعاء يونيو 10, 2009 12:54 pm

Salmano · **مرسل:** الأربعاء يونيو 10, 2009 8:17 pm

sunfoor · **مرسل:** الخميس يونيو 11, 2009 2:08 am

Salmano · **مرسل:** الخميس يونيو 11, 2009 3:05 am

المسلمي · **مرسل:** الخميس يونيو 11, 2009 12:58 pm

المسلمي · **مرسل:** الخميس يونيو 11, 2009 1:54 pm

المسلمي · **مرسل:** السبت يونيو 13, 2009 6:42 pm

مواصلة في المكيفات

اليوم داك جيت قبل باقي الشفع وطلعت في الشجره وحدي زي القرد

منتظر باقي الشفع يجو واحد جاء مافي والساعة عملت 2:30 ظهرا

فجاءه جاء شافع اصغر مني ماشي مرسلو عمو لي تمباك اسمو وليد

ناديتو يا وليد الشافع جاني قلت ليه احمد اخوك وين قال لي في البيت

وانت جاي من وين قال لي جاي من دكان حاج علي رسلني عمي حسن

لي صعوط قلت ليه خلاص كدي جيب الصعود دا جاي الشافع شال الكيس

اداني ليه كبيت منو شوية في يدي واديتو الكيس اترددت اسفها ولا ما اسفها

اتوكلت علي الله وكشحتها من يدي قلت بلا صعود بلا كلام فاضي

وانا طالع في الشجره فوق اها جزء من الصعود فضل في يدي قلت ياخ الشوية دي

ما بتسوي حاجة اجربها بس النشوف الصعود دا بسوي شنو الناس ديل بسفوه

اول ما ختيتها في خشمي دقيقة ما عديتا احس ليك بي راسي دا بقي كبيييييييييير

وبطني طمت واشوف ليك الواطة دي لافة

بصقتها ليك من خشمي ويا الله نزلت من الشجره حركت وراء من فوق لي الواطة

وقت حصلت الواطة قعدت اطرش وجاتني ليك زي الحمي وخفت خوف قلت الشي دي

فيها شنو المهم اتوكلت علي الله ومشيت البيت اتلت التقول سكران

الله يوصلني البيت بس واقرب سرير فت نومة من الظهر لي قريب صلاة العشاء انا نايم

وقت صحيت لقيت عيوني زي المطششة ونية في الاكل مافي كلو كلو حالتو دي الغدا ما متغدي

من اليوم داك بقيت اكان شفت لي زول داير يسف بطني بتطم الا اغمض عيوني :mrgreen:

sunfoor · **مرسل:** الأحد يونيو 14, 2009 1:05 am

المســلمي..

قصتك دي تبيكال مع اختلاف بيسيط مع حكايتي مع ما يسمى بالصعوط :mrgreen:

المهم..
كنا جينا اجازة السودان هع.. وعمري كان 9 او 10 تقريبا..
المهم اولاد الفريق كلهم شماشة وبسفو وكنت بمشي اقعد معاهم .. اهو مافي موضوع..
وكل نص ساعة كدا بطلعو الكيس وبمرروه.. البسف يدي الجنبو لحد ما الكيس يرجع لي سيدو :mrgreen:

وكنت لما الكيس يجيني ولا بهبشو بي يدي .. بقوم الكز الجنبي اقول ليهو شيل هنايك دا :evil:

..
ومشيت على الحالة دي كم يوم كدا ..
لحدي ما يوم اتفقو على تقريبا ..
طلعو الكيس ومدوه لي اول واحد

قلت ليهو ما عايز

سف ياخي سف احسن ليك.. وانا مصر ما عايز ..
اخر حاجة جاني واحد كدا محنكاتي نمبر 1..
عندو سياسة كدا غريبة .. قعد يحنك معاي كداااااا... اقنعني

ياخ دا بي كلامو بقا لي الصعود دا احلى حاجة في الدنيا :mrgreen:

..
المهم دنكل لي سفة صغيرة كدا .. >>بسموها بعرة :lol:

واداني ليها.. وانا العوير شنقتها زي الما حصل حاجة وخشيت ليفت معاهم في الونسة لحدي ما حصل الحصل ..
طراش + لفة راص + طمام بطن .....
مشيت الزير مصمصت خشمي سريع وخشيت البيت مدروخ وما فاهم اي حاجة ..
ونمت..
النومة الياهة لحدي العشا تقريبا وقمت زي المسلمي كدا نفس مقفولة وزهجان ..
كشفت كدا لقيت راصي لسة مدروخ وخشيت لي في نومة تانية ! :lol: