ممكن نجاوب؟..
نجاوب ماعارفيني انتو ولد ولا بنت ..
المهم..
يوم عندنا صاحبتنا كدة حنكوشة وجاية على بيت صاحبتنا الماحنكوشة .. الباندة من شعرها وقعت وأولاد الحلة شالوها
وجروا بيها ..جات علينا نحن الفتوة طبعاً .. عشان نرجعها ليها منهم ..
أها صاحبتنا الماحنكوشة شدييدة خلااص
قالت نلبس ثياب عشان لزوم جاهزين نسوان وشكلة وكدة ..ومشينا على البيت ..
يللا داخلين الصغار دخلونا للمرة ست البيت لقيناها قاعدة في نص عنقريب كدة وبتعمل في قهوة ومعاها نسوان ..
غايتو منظر يطير القلب .. لكن قلنا نتشجع عشان نرجع باندة البنت المسكينة ..لانه أهلها حيلومونا انه دخلناها أحياء
زى دى ..
وبعكس ما اتوقعنا المرة قاعدة بكل مزاج طلبت ينادوا ولدها الشال الباندة ..وقدمت لينا قهوة ..وقالت نرمى
ليكم الودع يابناتى الليلة وقت الله دخلكم علينا .. وبردت لينا الموضوع كأنه ماحصل شئ ..
أها ؟؟ نجى للودع ..أسمعى انتى ياست الباندة حتعرسي سيد العربية البوكسي مع انه عينك على بتاع الكورولا ..
ديك فتحت عيونها وسكتت سااااي ..وانتى ..قبلت على أنا .. الجابوا ليك القماش اللى فيهو ورود ..حتعرسي ولدهم ..
أنا فتحت عيونى لييييييييي آخرهم .. ماعشان العريس .. عشان القماش الجابوا لى داساهو من صاحباتى ..
طلعت وقلت ليهم أطلعوا يللا ..كذب المنجمون ولو صدقوا