أنا اوريك.. والله بعملا سمحة شديد لمن مسميني مزن شعيرية على وزن حوا لقيمات "ما لعرفا منو ؟
"..
المهم ..
تجيب طوا تختا في النار وتخت شوية زيت كده ... تقعد تكسر فوقو الشعيرية .. وما ترفع النار شديد لحدي ما تخلص تكسير الشعيريات ... المهم تجيب "كمشة" وتقلب بيها الشعيرية في الزيت .. عشان ما يبقى نصها محروق ونصها ابيض.. تقلب مظبوط لمن تصبح الشعيرية "ذهبية اللون"
.. يعني يبقى لونها كده جميل ..تقوم تكب فيها موية بسرعة قبال ما تحرق .. وعشان كده تحاول انو تكون الموية جاهزة جنبك في جك ولا حاجة... ما تكتر الموية لانو تقدر تزيد لو نقصت بعدين... بعد ما تخت الموية طوالي تضيف ليها ملح "نص ملعقة صغيرة كده" بسيط ما تكتر .. وحتتين قرفة و 3 هبهانات مكسورات "او على حسب الرغبة" .. بعدين تستناها تنجض .. ما بتاخد كتير فخليك في المطبخ احسن من تحرق ليك... لو لقيتا مويتا كملت وهي لسه ما نجضت زيد حبة موية ..
لمن تنشف مويتا أضيف سكرية سكر عليها وحركا على النار شوية " في ناس بتضيف شوية سمن و زبيب" واطفيها .. واتفضلا طوالي..بالصحة والهنا
غايتو كان فشلت الشي دي انا ما شوفتك ولا بعرفك