اسم مكلوَج مش
حقيقي ما لقيت ليها اسم تاني
هي عبارة عن تحلية ما مفهومة.. سلطة من فواكه + كستر + كيكة = سكلكطكة
وممكن تتاكل مع الشاي أو بدون
* حتحتاجوا لكباية شاي سااادة للقياس (كباية صغيرة يعني)
* فاكهة ظريفة كدا مقطعة قطع صغيرة (ابعدوا من البرتكان والقريب فروت لانهم ما بطلعوا حلوين)..
وممكن تختوا أكتر من نوع فاكهة.. انا اخترت منقة هنا..
* بالنسبة للزمن : تحضير + تزيين بتاخد 20-30 دقيقة
المقادير لـ 4-5 أشخاص: - كباية ونص دقيق
- كباية لبن (حليب / أو ملعقتين لبن بودرة ونحلها بموية)
- ثلاثة أرباع كباية زيت
- كباية وربع سكر
- بيضتين
- ملعقة شاي بيكينغ باودر Baking Powder
- رشة ملح خفيفة (ربع الملعقة الصغيرة.. ما تجوطوا الدنيا
)
الطريقة: تجيبوا صحن غريق كبير وتكبوا الحاجات الفاتت دي كلها فيه.. الناشف بعدين المواد السائلة
وممكن تبدوا بالترتيب البعجبكم..
تحركوا الخليط بالملعقة (أو مضرب كهربائي) لحدي ما الخلطة تبقى ملساء وشكلها مقنع (بطلع اللون على أصفر)
بعد داك تفتحوا الفرن مسافة ما يسخن تعملوا الآتي.. تدهنوا صينية الفرن بحبة زيت (ملعقة زيت كبيرة تقريباً)
ويا حبذا الصينية تكون مدورة.. بتدي شكل ظريف
ترجعوا للخلطة حقت قبيل وتكبوها في الصينية وتدخلوها الفرن (بتاخد زي ربع ساعة)
في المسافة دي.. تجيبوا ملعقة كبيرة من بودرة الكستر + ملعقة كبيرة سكر وتلخبطوهم مع كباية ونص حليب
وتسخنوها في النار مع التقليب (3 دقايق كدا) لحدي ما تتخن/ تبقى تقيييلة
تطلعوا مشروع الكيكة من الفرن.. خلوها تبرد شوية.. بعدين اقلبوها في صحن التقديم
تجيبوا خلطة الكستر وبراااااحة تكبوه فوقها (الكيكة فيها مسامات حتشرب منو جزء)
وتكبوا تكبوا لغاية ما الكستر يعمل طبقة فوها (زي البتليسوا في مونة يعني
)
بعدها تجيبوا قطع الفاكهة (المنقة) وتوزعوها فوق الكستر.. وممكن للزيادة تختوا قطع مربى صغيرة بي فوق
تدخلوها الثلاجة لمدة ساعة.. وحيطلع شكلها زي دا..
وبالهنا إن شاء الله تعجبكم
© All rights reserved